sheeko Gaaban

Cigaal Shidaad iyo Taleefanka Qaranka

Qaybta 1: Cigaal iyo Dunida Casriga ah

Cigaal Shidaad, oo ahaa nin lagu yaqaanay caqli iyo khiyaano xalaal ah, ayaa sanadkii 2025 yimid magaalada Muqdisho. Wuxuu ka yimid miyiga, isagoo la yaaban sida magaalada ay u iftiimayso habeen iyo maalin. Geel iyo dameero ayuu ku soo barbaaray, laakiin hadda wuxuu arkay gaadiid koronto ku shaqeeya iyo dad aan gacanta marna ka bixin taleefan.

“Waar, maxaa dadka u haya sidii ay geela u raacayaan laakiin geelaan arkin?” ayuu isweydiiyey isagoo yaaban.

Wuxuu go’aansaday inuu is baro “taleefanka gacanta” oo uu arkay qof walba uu leeyahay. Wuxuu aaday suuq weyn, halkaas oo uu ku arkay wiil dhalinyaro ah oo iibinaya moobeel cusub.

Cigaal: “Waar wiilkan, maxaa sheygan yar ee ifaya ah?”

Wiilka: “Adeer waa taleefan smartphone ah, wuxuu sameeyaa wax kasta!”

Cigaal: “Wax kasta? Ma ari ayuu fooshaa?”

Wiilka qoslay: “Maya adeer, laakiin wuu kuu sheegi karaa halka ay ari joogaan.”

Cigaal ayaa indhaha kala qaaday. “Haddii uu i sheegi karo halka ay ari joogaan, waa inaan mid iibsadaa!”

Qaybta 2: Taleefankii iyo Cigaal

Wuxuu iibsaday taleefankii ugu qaalisnaa suuqa. Laakiin dhibaato ayaa dhacday – ma garanayo sida loo isticmaalo.

Cigaal wuxuu isku dayay inuu la hadlo taleefanka:

“Waar taleefanow, ii sheeg meesha uu geela Faarax maray.”

Taleefanka ayaa aamusey.

Wuxuu ku celiyey: “Haye adigaa la yiraahdaa caqli leh, maxaa la aamustay?”

Wiil yar oo agtiisa marayay ayaa qoslay. “Adeer, waa inaad furtaa internet-ka.”

Cigaal: “Internet? Waa maxay internet?”

Wiilka: “Waa meel walba oo aad wax ka raadin karto.”

Cigaal: “Meel walba? Xataa hooyaday?”

Wiilkii qoslay, isagoo taleefankii u furay “Google Maps.”

Cigaal wuxuu arkay khariidad ifaysa. “Aha! Tani waa sida roogii barakaysan ee Nabi Suleymaan, meel walba waad ku tagtaa adigoo aan dhaqaaqin!”

Lasoco qeebta 3 xaad